1Ti 3 | MTI | STEP | Gae mame me natawa di, “Apan da siosi nauwawa aug amaratanwa anopewa, me nau oraimina di.”

1 Timothy 3

Siosi Namuyoiyoi Igiyawa

1 ^aGae mame me natawa di, “Apan da siosi nauwawa aug amaratanwa anopewa, me nau oraimina di.” 2 ^bMeoya siosi amaraivi abnawa me apan mameiba. Me gumbe pui den yupe, apan me biviwa desirom, membo amarape, mokona ape, iyayapan me gumbe ayamat ape, iyayapan gumbo baigan aigimpe, oma ane toyau munigimpe, 3 wain koka den nape, iyayapan den gurigimpe, iyai wakeigimpe, anmaga oya den anoigimpe, 4 vesin ud meuma amat amunigimpe, me usitainawa mamowa gumbe ayamat ag noiwa avigimpe. 5 —Me biviusiwa yaimoyai den amat a munigimpewa, aninin me God siosi meuma amarape?— 6 Gare mame apa di apan me anotumat amatonewa me oma den ane.

Me apanapan aigimpe, ge pui aupe gina desiroma Seitan pui avivi mina. 7 ^cMe mina, siosi daieve wakeya igiyawa wape me apan oraiwa. Me apan me mina den apewa, iyayapan topai ape sira Seitan nama meuma danave unikpe. Me bainda onan.

8 Siosi kansoru me apan mameiba. Iyayapan me gumbe ayamat ape, noiwa gae duwam den waigimpe, wain koka den nape, anmaga oya ugauga den waigimpe, 9 me nonemagawa oraiwa esinewa gumbe, anotumat anoanowawa guwavewa danavewa yumnatpe. 10 Namu ye mu ag yawamiya. Divi da gumbe kukaeba da den apewa, mu oma ane siosi kansoru ape.

11 ^dMu bivituwa mu mina meib. Iyayapan ayamat amunigimpe, me gae kukaeba iyayapan gumbo den waigimpe, membo amarape, sira dividivi undag gumbe imidanowa oraivit gumbe aigimpe.

12 Siosi kansoru me apan me biviwa desirom di, sira me oma ane biviusitainawa amat amunigimpe. 13 Meoya apan me siosi kansoru nauwawa yaimoyai apewa, me arawa oraivit painauvitwa ape, sira me Keriso Iesu gumbe anotumat imiwa kokavit aupe.

14 Ne koni ge gungap ongetan anoeni, megara ne gigirum mame teeni. 15 Kuiyawa me ne matai kum waropiyag me kumiwa apa den onetna ipewa, ge yaug anotanit di God gweyawa danave aninin amon. God gweyawa me God wakeiviwa siosi meuma, sira siosi me irap ge an nium natawa oya. 16 ^eMame me natawa, singui da den wakene, God anoanowawa natawa guwavewa me kokavit:

“Keriso kwapiwa gumbe taibe uwamunne,
Guwawa gumbe me taibe wane me oraimina,
aneya mu me yauya,
iyayapan yapowo me oya opata waya,
iyayapan me gumbe piyu mame danave anotumat aya,
eyawa danave aug dog aine.”